کراچی۔28ستمبر (اے پی پی):وفاقی وزیر تخفیف غربت و سماجی تحفظ شازیہ مری آکھیے جو ہݨ تئیں بینظیرایمرجنسی کیش امداد دے تحت سیلاب متاثرہ20 لکھ خانداناں اچ 25 ہزار روپے فی خاندان امدادی رقم تقسیم کیتی ڳئی اے ، مستحق سیلاب متاثرین اچ ہݨ تئیں 50 ارب روپے توں ودھ دی رقم تقسیم کیتی ڳئی اے تے ہݨ حالی تئیں اے سلسلہ جاری اے ۔ جاری بیان دے مطابق انہاں آکھیے جو وزیراعظم محمد شہباز شریف سیلاب متاثرین اچ 25, 25 ہزار روپے فی خاندان ݙیوݨ دا اعلان کیتا ہئی جیں دی ذمے واری بینظیر انکم سپورٹ پروگرام کوں ݙتی ڳئی ہئی ۔ انہاں آکھیے جو پاکستان ایں ویلھے سیلاب پاروں ٻہوں سنگین حالات دا سامݨا کریندا پئے ساݙی پوری کوشش اے جو ٻئے لوک رہ ڳئن انہاں تئیں وی 25 ہزار روپے دی امدادی رقم پڄائی ونڄے ۔شازیہ مری آکھیے جو امدادی رقم توں ناجائز کٹوتی کرݨ آلیں دے خلاف سخت ایکشن ڳھدا ، ملوث کرمنل عناصر کوں گرفتار وی کروائے ۔انہاں آکھیے میں خود بینظیرانکم سپورٹ پروگرام دی قائم شدہ کیمپاں دا دورہ کرتے سارے عمل کوں مانیٹر کریندی پئی ہاں ،جتھاں وی کٹوتی دی ثبوتاں دے نال شکایت موصول تھیندن اتھاں وختی کاروائی عمل اچ گھن آئی ویندی اے۔ وفاقی وزیر آکھیے جو بینظیر انکم سپورٹ پروگرام دا پورا عملہ اتے ٹیماں میدان اچ موجود ہن، مشکلات تے مواصلاتی نظام درہم برہم تھیوݨ دے باوجود بینظیرانکم سپورٹ پروگرام دیاں ٹیماں کشتیاں اچ سوار تھی تے متاثرین اچ امدادی رقم تقسیم کریندے پن۔
